Zaczyno sie tyn film niyźle. Trocha tricków z gier kómputerowych pokozanych na ekranie, trocha zagrywek z Indiany Jónesa, rezydyncja i lokaj jak z Batmana, no i rzecz jasno apetyczno Angelina robióm swoje. Niystety potym jes już ino gorzij... Posóngi Buddy i kamiynnych wojowników łożywajóm i zaczynajóm prać sie z naszymi bohatyrami (może w grach to ludzi kryńci, ale w kinie dó mie zawsze bydzie to gupie. Odmrożynie Hana Solo kupuja, ożywanie posóngów niy!). Finał filmu tyż pozostawio sporo do życzynio. Surrealistyczny pościg po krawyńdzi piramidy kajś poza czasym zwalo z nóg, ale trwo ino pora sekund... Zresztóm takich numerów we filmie jes wiyncyj. Sekwyncja przybycio do jakigoś miyjsca zapiyro dech w piyrsiach, ale już to co sie w tym miyjscu bydzie dzioło za ciekawe niystety niy jes. Czyli? Czyli kupa fajnych scyn do klipów i zwiastunów z tego filmu wymóntować idzie (i tak tyż sie stało, bo klip U2 pt. „Elevation” promujóncy tyn film to dó mie perełka), ale jako całoś niy bardzo kupy sie to wszisko czimo bezto dowóm 5-6/10 (te 6 to za poczucie humoru scynarzystów, kierzy trocha dowcipnych ripost tukej jednak powciepowali) i polecóm kóntynuacja tego filmu, bo dwójka jes bardzij bóndowsko i po prostu lepszo.